الخصوصية

البيانات اللي بنجمعها

لما تعمل حساب

• الإيميل، الاسم اللي هيظهر للناس، واسم المستخدم.
• كلمة السر بتتخزن مشفّرة بطريقة ما تسمحش لحد — ولا لينا إحنا — إنه يرجّعها زي ما هي.
• نبذة عنك، لو كتبتها. اختيارية.

اللي بتنشره بنفسك

• القضايا اللي بتكتبها: العنوان، المشكلة، الطلب، التصنيف، المكان، الجهة المسؤولة، وأي روابط أدلة بتضيفها.
• التحديثات اللي بتكتبها على قضاياك.
• القضايا اللي بتدعمها، والبلاغات اللي بتبعتها لنا.

بيانات تقنية

• جلسة الدخول: الكوكي اللي في متصفحك فيه رمز عشوائي، وإحنا بنخزن بصمة مشفّرة منه بس — الرمز نفسه مش موجود عندنا.
• عشان نمنع السبام، بنحوّل الـ IP بتاعك لبصمة مشفّرة بمفتاح سرّي ونستخدمها كعدّاد مؤقت. الـ IP نفسه مش بيتخزن.
• أحداث استخدام في قاعدة بياناتنا (زي: اتنشرت قضية، اتضاف دعم) عشان نفهم إيه اللي بيشتغل. دي بتبقى عندنا، مش بتروح لحد بره.

إيه اللي بيبقى ظاهر وإيه اللي بيفضل خاص

ظاهر لأي حد

• القضايا اللي بتنشرها، والتحديثات عليها، والاسم اللي هيظهر واسم المستخدم بتاعك عليها.
• عدد الداعمين لكل قضية.

مش ظاهر لحد

• مين دعم قضية إيه. الرقم بس هو اللي بيظهر — مفيش أي مكان في الموقع بيعرض قايمة الداعمين.
• إيميلك. ما بيظهرش على أي صفحة عامة.
• البلاغات اللي بتبعتها. بتوصل لفريق المراجعة بس، ومش بتتقال لصاحب القضية إنها منك.

الكوكيز

بنستخدم أقل عدد ممكن، وكل واحد ليه سبب:

motadamen_session

بيخليك مسجّل دخول. لازم عشان الحساب يشتغل.

motadamen_flash

بيوصّل رسالة تأكيد واحدة بعد ما تعمل حاجة، وبيتمسح فورًا.

motadamen_consent

بيفتكر ردّك على سؤال الإحصائيات عشان ما نسألكش تاني.

Google Analytics

بنستخدم Google Analytics عشان نعرف الصفحات اللي الناس بتزورها وجايين منين. مش بيشتغل غير لو وافقت: قبل كده مفيش أي بيانات بتتبعت.

• ما بنبعتش لهم اسمك ولا إيميلك ولا رقم حسابك.
• ما بنبعتش لهم نص القضايا اللي بتنشرها أو بتدعمها.
• ما بنستخدمش المنصة في إعلانات، وما بنبيعش بيانات لحد.

لو غيّرت رأيك، امسح كوكيز الموقع من متصفحك وهيتسألك تاني.

مدة الاحتفاظ

• جلسة الدخول بتنتهي بعد 30 يوم من آخر استخدام، وبتتمسح من عندنا.
• عدّادات منع السبام بتتمسح بعد يوم واحد.
• سجل قرارات الإدارة والمراجعة بيفضل دايمًا وما ينفعش يتعدّل ولا يتمسح — ده اللي بيخلي المراجعة نفسها قابلة للمحاسبة.
• القضايا المنشورة بتفضل موجودة عشان الناس تقدر ترجع لها، حتى بعد ما تتقفل.

مين من الفريق يقدر يشوف إيه

• فريق المراجعة يقدر يشوف البلاغات والقضايا، بما فيها المحذوفة، عشان يقدر يراجعها.
• الإدارة تقدر تشوف الإيميلات وتبحث بيها لما تحتاج توصل لحساب معيّن.
• أي قرار إداري بيتسجّل باسم صاحبه في سجل ما ينفعش يتعدّل.

اختياراتك

• تقدر ترفض الإحصائيات من الشريط اللي بيظهر أول مرة، وده مش هيأثر على أي حاجة تانية في الموقع.
• تقدر تسحب دعمك من أي قضية في أي وقت، وساعتها السطر بتاعك بيتمسح خالص.
• تقدر تعدّل بياناتك من صفحة الحساب.

حذف الحساب

لسه ما اتبنتش. لما تتعمل، الحساب هيتحوّل لمجهول بدل ما يتمسح، عشان أعداد الداعمين وسجل المراجعة يفضلوا صح. لحد ما يحصل، ما ينفعش نقول إن الحذف متاح.

لو الصفحة دي اتغيرت

لو غيّرنا حاجة في اللي بنجمعه، بنغيّر الصفحة دي معاه وبنحدّث تاريخ آخر تعديل فوق.